13 Decembro, 2021
O Concello de Camariñas levou a cabo o replanteo previo ao inicio das obras para a pavimentación da rúa Virxe do Monte e a reparación de beirarrúas, un proxecto que conta cun orzamento de 40.288,61 euros e que está financiado a través do Plan Único da Deputación da Coruña.
Os traballos, que comezarán nos próximos días, inclúen a demolición dos actuais bordos e beirarrúas así como do pavimento da vía para a súa posterior substitución por outro bordo prefabricado de formigón, a execución de novas beirarrúas en solera de formigón e a pavimentación da calzada con aglomerado asfáltico. Ao rematar, procederase ao pintado da sinalización na vía e dun paso de peóns.
A alcaldesa, Sandra Insua, destacou a importancia desta obra “xa que a rúa atopábase actualmente en mal estado debido ao paso do tempo e dificultaba o paso tanto de peóns como dos vehículos”.
