En marcha unha nova edición de “O Mar na Escola”, unha actividade na que os alumnos se familiarizan co mundo marítimo

En marcha unha nova edición de “O Mar na Escola”, unha actividade na que os alumnos se familiarizan co mundo marítimo

  • 92 estudantes dos centros educativos de Camariñas participan os luns e venres en diferentes exercicios para desfrutar do mar e adquirir concienciación do seu valor natural.

 

“O Mar na Escola”, o programa destinado a que os rapaces teñan contacto co mar, xa ten unha nova edición en marcha. A iniciativa do Concello de Camariñas, que naceu hai 19 anos, pretende que os rapaces e rapazas que estudan no municipio accedan ao mundo marítimo a través de deportes náuticos e tamén alcancen unha concienciación de respecto co valor natural do mar.

 

O programa está destinado aos alumnos de 5º e 6º de Primaria dos colexios CEIP O Areal de Camariñas e CEIP Ponte do Porto, e de 1ºEso do IES Pedra da Aguia. En concreto, nesta edición participan 92 alumnos, que xa probaron deportes como a vela ou o kayak desde que a iniciativa comezou, o luns 13 de marzo.

 

En total, esta edición conta con cinco clases por curso a desenvolver os luns e os venres en horario escolar nas instalacións do Náutico de Camariñas. A iniciativa é desenvolvida pola empresa UbuntuLife.

 

Campamento na Mostra do Encaixe

 

Por outro lado, en Semana Santa, o Concello de Camariñas e UbuntuLife organizan a maiores unha actividade de vela. Coincidindo coa Mostra do Encaixe, de luns a venres celebrarase o “Encaixe azul”, un campamento de vela denominado “Encaixe azul”.

 

O prezo da actividade é de 35 euros. Hai un máximo de 20 prazas e é preciso contar con licencia federativa. As reservas pódense concretar no 665051031.